ЧIехи шейх рикIеваз…

Алатай гьафтедин хемис юкъуз, Мегьарамдхуьруьн райондин Медениятдин кlвалин чlехи залда, мусурманрин зурба философ, чlехи алим Ярагъ Мегьамедаз талукьарнавай нубатдин форум кьиле фена.

Форумда «Мегьарамдхуьруьн район» МР-дин Кьил Фарид Агьмедова, Дагъустандин мили сиясатдин ва динрин рекьяй министрдин заместитель Мурад Шафиева, ДГУ-дин профессор, философиядин илимрин доктор Салигь Муслимова, РД-дин муфтиядин куьмекчи Идрис Асадуллаева, М.Ярагъидин фондунин регьбер Гьажибуба Рустамова, Кефер патан Къавкъазда исламдин ахтармишунрин центрдин директор Руслан Гереева ва дагъустандин кьуд пипlерай атанвай, шейхдин гьуьрмет хуьзвай илимдин ва медениядин деятелри иштаракна.

Форум «Магьарамдхуьруьн район» МР- дин Кьил Фарид Агьмедова тебрикдин гаф рахунилай башламишна ва и важиблу межлисда иштаракзавай гьар са касдиз «Чухсагъул» лугьунилай эгечlна:

­­ — Гьуьрметлу вахар ва стхаяр! Аваданлу дагъустандин чил, дуствилелди уьмуьр тухузвай, ислягьвал кlани, чпихъ жуьреба-жуьре рекьерай бажарагъ,агалкьунар хьанвай ва жезвай инсанралди девлетлу тир миллетрин ватан я. Дагъустан гзаф алимри,философри дуьньядиз машгьурна, гьа жергедай Чечнедини Дагъустандин имамрин муаллим, шейх Ярагъ Мегьамеда лайихлу тир чlехи чка кьунва. Ярагъ Мегьамед кутур метлублу пай къимет авачир кьван багьа я.

Са йис идалай вилик,и залда чна Ярагъ Мегьамедаз талукьарнавай 1-форум тухудайла,за иштаракчийрин вилик, и форум гьар йисуз тухун жигьетдай ва межрегиональный статус гун патал герек тир органрихъ теклиф гваз элкъведа лагьанай. Заз квез са хабар гуз кlанзава хьи, къенин йикъалай кьулухъ чи форум и чlехи тlварцlин иеси я. Заз гьар са касдиз гзаф кьадар сагърай лугьуз кlанзава, чпи гьакъисагъ зегьмет чlугуналди и кlвалахдиз къуват гайи. Шейх Ярагъ Мегьамедан руьгьдин ирс дериндай ахтармишун паталди ва ам гьар са инсандал, иллаки жегьилрал агакьаруниз и кlвалахди чlехи куьмек гудайдахъ зун инанмиш я, — лагьана

Фарид Загьидиновича.

Райондин Кьил рахадайла кьулухъ, мусурманрин Пак Кьуръан кlелун патал,сегьнедал Ярагъ Мегьамедан неве, гьафиз Сайидмегьаммед Гьамидов хкаж хьана. Ада Кьуръандин пак аятдин са сура кlелайдалай кьулухъ, межлис кьиле тухузвай Фарид Агьмедова форумдал рахаз кlани гьар са инсандиз гаф гана.

Дагъустанди муфтиядин куьмекчи Идрис Асадуллаев Ярагъ Мегьамедан уьмуьрдин рекьикай,ада дагъустанда мюридизм мягькем хьунин мурадалди авур чlехи кlвалахрикай гзаф метлеблу рахунар авуналди тафаватлу хьана.

Нубатдин гаф МР-дин Кьил Фарид Загьидиновича РФ-дин лайихлу артист Абдул Гьабибоваз гузва. Ам Ярагъ Мегьамедан къаматдин ухшариз гъана, са гъиле аса ва муькуь гъиле теспягьар аваз микрофондиз мукьва хьана:

Гзафбур хъунрални тарашунрал,къачагъвилелни кьисасар вахчунал машгъул хьанва. Бес ибур динэгьлийриз кутугай крар яни? Чун я мусуранар туш,я хашпараяр. Эхь,гафаралди чун мусурманар я, анжах гафаралди. Туштlа,лагь, нивай лугьуз жеда «Зун халис мусурман я»?

Дуьньядин чиркер патал, тlуьнар-хъуьнар патал, девлетар патал, чна Пак Кьуръанди къалурнавай рехъ михиьиз рикlелай алуднава. Чир хьухь, ахьтин са югъ къведа хьи, квез я девлетрикай, я веледрикай кьадай чка хъжедач. Анжах михьи рикlерни малаикрин ниятар авай,са имандал атанвай инсанар Аллагьди вичии михьи лувук кутада. Мусурман азаддиз хана ва азаддиз рекьизвай инсан я. Гьич са вахтундани масадан пацук, лукlвилик хьана кlанзавайди туш. За квез адалатлувилин, гьахълувилин, дуьз рекьиз эвер гузва. Буюр,ша захъ галаз!,- вичин рахунра А.Гьабибова Ярагъ Мегьамедан веси к1елна куьтягьайла зал гурлу капарин ванцив ацlана.

Мярекатдал рахай гьар са иштаракчиди Ярагъ Мегьамеда философиядин илимдин, дагъустанда диндин хандакl кlеви авун патал чlугур гьакъисагъ зегьметдикай,адан руьгьдин ирсинин девлетлувиликай ва ам хуьн патал чна вири къуватар садна,къвезвай несилдал агакьарна кlанзавайдакай гегьенш рахунар авуна.

Мадни са кар къейдна кlанда хьи, межлисдин эхирдай и важиблу форум вини дережада аваз кьиле фин патал чlехи куьмекар гайи лайихлу ксарив «Мегьарамдхуьруьн район» МР-дин Администрациядин ва Дагъустандин милли сиясатдин ва динрин рекьяй министерстводин патай грамотаяр ва савкьватар вахкана.

Владик Батманов