ЧИ ТАРИХДИН БЕГЬЕРЛУ I0 ЙИС

Жегьил несилдихъ галаз кIвалах авунин жигьетдайни Мегьарамдхуьруьн район республикадин сифте жергейра авай муниципалитетрикай сад я.

Районда гьар йисуз цIудралди спортдин мярекатар тухузва, цIудралди спортсменри жуьреба-жуьре чемпионатра иштиракзава, медалар къазанмишзава. Мягьтел жедай кар туш, вучиз лагьайтIа Мегьарамдхуьруьн районда спортдин 12 жуьредай спортсменар гьазурунал кIвалахзава. Иллаки дзюдодиз, азаддиз кьуршахар кьуниз, боксдиз, каратедиз, залан атлетикадиз гзаф жегьилар желб хьанва.

Санлай къачурла спортдал машгъул жегьилрин кьадар 5000-далай алатнава. И жигьетдай райондихъ агалкьунар авайди тестикьарун яз 2018-йисуз Дагъустан Республикадин муниципальный тешкилатра физкультура ва спорт вилик тухун лап хъсан тешкилунин рекьяй республикадин конкурсда Мегьарамдхуьруьн район гъалиб хьайиди малумарна ва адаз РД спортдин рекьяй 1-й дережадин Диплом гана.

Гьа са вахтунда райондин кьил Фарид Агьмедовни РД-дин физкультурадинни спортдин Министерстводин гьуьрметдин грамотадиз лайихлу хьана.